فى إنتظار الموت....

من كتر حركتى

بشتت راحتى

بعيش اللحظة وأستمتع بالدقيقة

بحب الدنيا وأموت فى الحقيقة 

لكن للأسف . .

الموت هو الحقيقة الوحيدة!
 
=============

 
قالوله إرضى بنصيبك..

قالهم لأ

قالوله عيش الحقيقة..

قالهم لأ
 
فكانت النتيجة..عمره منه إتسرق!!

عارف إن المدونة فاضية لكن فى الحقيقة

والله انا مشغول أوى اليومين دول ومش فاضى أكتب

وأدون واظبط مدونتى زى ما انا عايز

لكن من شوية شفت بنت بصراحة لافتة نظرى وبتشدنى

لماأشوفها وكنت كتبت عنها حاجة زى ما تقول رباعية

وإليكم ماكتبت

======

سرحت مع روحى دقيقة

فى الحقيقة ..جميلة أوى ورقيقة

سحبت سهم من كيوبيد

نفسى أصيب قلبها

بس خايف

ماتكونش إصابتى دقيقة

========

البنت دى أنا حتى ملمحتلهاش بأى حاجة بس حاسس إن عينيا فضحانى

فى ذكرى إنتخابات الرئاسة...فقراء مصر يدفنون أحياء

إنهارت امس كتل صخرية تتعدى 70طن من جبل المقطم
سقطت على عزبة بخيت بالدويقة شمال القاهرة
فذهب العشرات من الصائمون تحت الكتل الحجرية وابتلع المقطم العشوائيات وسكانها البسطاء
وحتى الأن تواصل القوات المسلحة كعادتها إنقاذ الموقف نظراً للعجزالدائم للأجهزة والوزارات المدنية. لأ دولة مدنية فعلا . .
بجد . . بلدهم بتتقدم بيهم المعلومات المؤكدة إلى الآن 32قتيل و50مصاب
فيما يؤكد الأهالى ان حوالى 500شخص دفنتهم الأنقاض أحياء
كالعادة تعتيم إعلامى شديد. . .
تواجد أمنى مكثف . . . .
والتغطية الرسمية تجعل المأساة بكل وقاحة . . مجرد قضاء وقدر

يا سلام ع الإيمان يا سفلة. . .
عادى يعنى ...500 روح يروحوا فطيس! ولا على إيه ...هما ال1000 اللى راحوا ف العبارة كانوا خدوا إيه . دى النيابة قالت إنهم ماتوا نتيجة إعياء عام!!و صاحب العبارة خد براءة. ضحايا الدويقة الذين تجاهلتهم الحكومة تغمدهم الله بواسع رحمته،وسيسكنون الجنة – بإذن الله – بعد إن حرمتهم الدولة من حقهم فى مساكن آدمية أمنة. أهلنا وأخوتنا فى الدويقة دمائهم فى رقبة النظام والقائمين عليه و الذين نصرخ فيهم من قلوبنا...كارهينكو. ملحوظة أخيرة: اليوم - 7سبتمبر- تمر الذكرى الثالثة لإنتخابات الرئاسة المسرحية عام 2005 ولانزال ننتظر المزيد من الإنجازات ربما تخرج من تحت الإنقاض! مع شهدائنا البسطاء.